حوذ ليبيا بحلالك

خوذ ليبيا بحلالك --- واحسب حسابك فيها

وطنك عزيز عليك --- وانسى اللي ناسيها

خوذ ليبيا يرضيك --- وماتقول ما نبيها

مازل عهدي بيك --- جالس على شاطيها

ولاتبيعها بيديك --- تاخذ رشاوي فيها

وراهو الحرام يجيك --- خطوة وتمشي فيها

تبدى المتاعب فيك --- وتخسر احبابك فيها

كسبك حلال يديك --- تكبر وتصغر ليها

عادل مسعود التريكي

اخي عادل التريكي من الجميل

من احب واصدق الناس التي قابلتها في حياتي

اتمنى ان القاه في الجنة؟؟؟

خويا الزين يانور الغلا --- نبقوا خوت حتى غبت

ولاننساك عايش في رضا --- وينك وين من بعدك تعبت

مشيت نشوف اريد الزها --- لقيت الدار من غيرك ذهبت

تحيى دوم في عيني انا --- حياتك حر خويا ماحسبت

نظيف القلب حتى مو هنا --- نشهد ليك ياعدوله كتبت

مرات- منقول

مرات يزها خاطري ودليلي - ومرات يانفسي عليا تميلي

مرات يزها خاطري ويجلى - ومرات يبقى في النهار ظلام

مرات يزها خاطري وعيوني - ومرات يادنيا عليا تهوني

مرات يزها خاطري ونلقاهم - ومرات ننسى النفس وانا معاهم

مرات يزهى خاطري ونتعلى - ومرات ومرات نرجع للحظيد وظله

مرات يزيها خاطري ونجيهم - ومرات نحسب في الخطاوي ليهم

مرات نزها لين نوصل حدي - ومرات تلتم المواجع ضدي

الى الصادق علي الصادق الحارس- القربوللي

ياصاحبي مازال - عز الرفيق اخترت

ياكلمتي في الحال - لاضقت لاكدرت

ياود عيني مال - قلبي معاك وصرت

محبوب في الترحال - ياخير ما جاورت

مانسيتني من البال - ولانك عليا هنت

انت عزيز رجال - وانت رجال اخترت

تبقى نغم موال - ياعز  ما عشرت

سلامي بلا مرسال - لا عين لا سافرت

جربت هلبى احوال - في دنيتي وخسرت

عرفت الهوى ميال - ياقدوتي وسافرت

ندعي غيابي طال - نلقاك كيف ذكرت

افقي وعمودي

أحب     صديقي  وهذا    محال

صديقي  احبه     كلام     يقال

وهذا     كلام     بليغ     الجمال

محال    يقال     الجمال  خيال

اقراء هذه الجمل افقي وعمودي

مولاي صلي وسلم دائما ابدا

مولاى صلى و سلم دائما أبدا  على حبيبك خير الخلق كلهم

محمد سيد الكونين والثقلين  والفريقين من عرب ومن عجم

هو الحبيب الذى ترجى شفاعته  لكل هول من الأغوال مقتحم

ثم الرضا عن أبى بكر وعن عمر وعن علي وعن عثمان ذى الكرم

يا رب بالمصطفى بلغ مقاصدنا  واغفر لنا ما مضى يا واسع الكرم

لعل رحمة ربي حين يقسمها    تأتي على حسب العصيان في القسم

النفس كالطفل ان تهمله شب على     حب الرضاعة وان تفطمه ينفطم

اهداء الى - جميل عبدالله خير الله

الليل كثر خيرة -- لقيته حنون وخيرلي من غيرة

الليل ماهو هين --  والليل في طبعه عزيز حنين
مايعاتبك لايجرحك لا يبين -- ومازت نحكي عاجبتي السيرة -- الليل كثر خيرة

الليل فيه صراحة -- والنفس عنده راضية مرتاحة
يطيب الهوى تبرى جمبع جراحه -- ساكن وهادي ورفقته مرتاحة
ومايقولك يكفيك فيها خيرة -- الليل كثر خيرة

الليل ماينساك -- لايعاتبك لايقول وويش اسماك
ولايحسبك مجنون في مسعاك -- ولايخذلك ويخون عهد معاك
ولايقابلك بحزن لاتكشيرة -- الليل كثر خيرة

طريقة التعليق للاخ عبدالعزيز التائب

تحياتي للجميع والاخ عبدالعزيز التائب -
1-اضغط على كلمة التعليق
2- كتابة التعليق في المربع
3- اختار التعليق باسم ( مجهول)
4- الضغط على (كتابة التعليق) سيتم النشر

خوذ الغلا واحسب حساب غيابه

خوذ الغلا واحسب حساب غيابه -- بالك ايجيك الوقت ماتكسابه
خوذ الغلا ياغالي --
نوصيك ماتتعبش كيف احوالي --
زاد الغلا وماحسبتها في التالي --
انا معاه ويسكر عليا كتابه
خوذ الغلا واحسب حساب غيابه -- بالك ايجيك الوقت ماتكسابه

MMMAM ليهم ود

سلام الود وايامك عسل                  

                                          تمشي الرجل ليكم علمهل

سلامك فوق في الخاطر كمل             

                                           نـــور العين بـاقيلي امــــل

وين انجيك ينشال الحمل                  

                                           تقوى الروح واوجاعي تقل

وكانك غبت ماعندي بدل                 

                                           كيف الطيــــر في قفصه يمل

شبحة عين من عينك اطل                

                                          كيف السهم في حلمي قتــل

  واجد وين طولتوا الحـــل                   

                                           قول  انجيــك مانعرف الذل

شربت المر وشرابي كمل                 

                                          كافي الصيد وانسـاه الحجل

عنك صقر يرجى فيك هل                   

                                           ليش البعد في غيـــري تسل

سلامي ليك مانعرف انمل                  

                                          نرجـــى دوم عيني مــاتكل

غبت بعيد وانت موش كل                   

                                         ليــــــك حنيـن قاعد ماكمل

طبك وين مانعرف هزل                     

                                        سيرة عمر طاحت في وحل

للتاريخ

لاتسألن عن الايام مافعلت        وافعـــل جميـــلا كيفما يحلو

ان السنين لا تحيي من قتلت           لكنهـــا لاتضـــع مـن يعلــو

صبرا جميلا ابنمـــــا حلت              فالكــل مــن تاريخهــا يرجوا

واشهد بصمت انهـــــــا ذلت             معالي القــوم حينما وهبــوا

تاريخهم للمــــــــال واحتلــت             انســابهم للغيـــــر مــا ملــوا

ايامنـــــا تشهد والنفس ماذلت          حتى وان جعنا نعلـوا ولايعلوا

هذا مااعرف فاعذرني ان زلت        انفاسنــــــــا تغفوا والقلــب لايغفو

يكفي الفتى شرفا *** دينا مع خلقا
صبــرا مــع عفا *** صفـا بلا كفـا

(واسأل كبار القوم جوعا مع الشرف)   (افضل من الاسياد تعلوا بلا عف)

وصية ليا وليك

يلي سكنت الدار *** هالدار ماهي ليك

تريد الحياة باصرار *** ماتريد من يهديك

وكل مايجيك انذار *** تبعد على شاطيك

وتترك حقوق الجار *** كيف الحياة تنسيك

ولا تقول دوم صغار *** وماهو الكلام عليك

أحسب حساب النار *** صادق كلامي ليك

وزقك على القدار *** ماهوش صنع يديدك

وسكت على ماصار *** اجرك على باريك

وارضى بحياة احرار *** وانسى المال ايجيك

وابعد على الانظار *** تسمع خبر يرضيك

واكتم جميع الاسرار *** مافيش من يؤذيك

وحاسب من الغدار *** لاتصاحبة ولا يجيك

من خيرت الناس

وينك وينك وينك

 هاذي الدنيا ياعزي وينك

لايدوم فرح وحزن عمي وينك

سلمتها للغير عيني عينك

ومافيش من يكدر يطول حنينك

مشكور من الاحباب واجد خيرك

الله يرحمك يرعاك وين سنينك

عقبت فيها اولاد خير  يكيفنك

ليهم شرف واخلاق ترفع عينك

من احب الناس

ياسيد نور الهدى      ياود عيني انا

انت وين مانك هنا     ياعين قلبي رجا

لا تهون لا تنتسى    مازال بيك الزها

والعين في امالها      تلقاه واقف هنا

محبوب ماطالها       محجوب غايب مشى

ياسيد مانك عدد     والقلب عندك نشد

والنفس صارت تعد   والخير منك مدد

وياخوي تبقى سند    وفي القلب ساكن ابد

ضيقة الحاطر والحياة المرمادة

ضيقة الخاطر والحياة المرمادة     تشيب صغير السن قبل نداده

كثير الدراهم والعمش في عيونة    يديروه كاينه غزال حمادة

بلا مال تبدى حالة منكوبة          وبالمال يبدى عزم فوق نداده

بلا مال ما تقدر شروط الهمة       تجواد ماتظهر عليك جوادة

والمال يغبي منو كان مسمى        والمال يشهر ناس ماهم سادة

بالمال حتى الخــــــــــايب       يجوا معاه جملتهم شباب وشايب

واما قليل المال قالوا سايب         يمشى يكــــــــــر الفحم للحداده

نشيدة نور دربي

إلى متى التدخين؟؟؟؟؟؟؟؟؟؟؟؟؟

كنت صغير السن والنفس لاتدري   جاء الذي يطعن في القلب والصدري

خلت نظرت من قــال انـــا عمري   اهديك بعض الحن للعين كالسحري

انت صديق السن والعقل والفكري   الســـــن بالالولن وكسرها يبري

والعقل بالاحسان ساعد على نشري   والفكر راح زمان اسحب مع الجمرِ

والجار ليك امان يسهـــر الى الفجرِ   بشــــــر حبيبي الان بالذل والفقر

اني مكلت مكــــان هـــذا نصري    هــــذا حالي الان صار العدو قدري

ولو كان فيك حنان التدخين من بدري   تبقى رفيع الشان مسجون ياعمري

يكفي فلوسك وين راحت ولاتدري   

عمر ابوذينة

ياعمر ابوذينة

 يعزف عليك القلب في تلحينه خوذ الرضا ونحنا الرضا يكفينا

نحنا رضانا بيك 

ومانيش ناسي لانساوم فيك طبعك وفا ونحنا الوفا نعطيك

ليك الغلا ياغالي

والقلب عندك دوم هذا حالي ومسرور منك خاطري وفعالي

لقيتك نظيف النية

ومانكش قاسي ياعزيز عليا ونبعث سلامي كل يوم تحية

نبعث سلامي ليك

وتبعك مع سيراء ومن يبيك وندعي المولى جنته يعطيك

رمز الوطن الغالي

مالك عليا ايمين *** ولانك عليا خــافي

عهدي معـاك سنين *** وانت غلانا الوافي

مازلت نور العين *** والفكر عندك صافي

ربيع المحبة وين *** بالوصف مانك جافي

العين تبي العين *** والعمر ماهو كافي

للقلب شبحـك دين *** وهذا رجــا لولافي

قلنا عليـك رزين *** وبالود طرفك ضافي

ذرفت دموع العين *** يا قدوتي واريافي

امل الفقير حنين *** والعشق ديمة وافي

في الحق ياحلوين *** والرمز لينا شافي

يارمز وطني سنين *** ليك التحية وكافي

الفرسان

الفرسان

مش كلهم على مواله  الفارس اللي مايديرش البطالة

الفرسان

ليهم ياعزيزي همة الفرسان قبل الفرسنة تسمى

الفرسان
وين تبيهم  يجوك بعددهم ماتوازي فيهم

الفرسان
ليهم غيرة  الفرسان ماتلقى معاهم حيرة

الفرسان
ماينذلوا الفرسان وقت المعركة مايولوا

الفرسان
مهما يصير ماينجروا الفرسان طول العمر ديمة يسروا

الفرسان
دين وجود ليهم طيبة الفرسان تصنع في المعالي هيبة

الفرسان
موش حظارة الفرسان جود وفرسنة وخسارة

الفرسان
كلمة يارجال صعيبة وتصغر مع كثر اللغى والغيبة

تحياتي لجميع الفرسان في ليبيا الحبيبة

(ماشاء الله على العقد) ترهونة

اخي مسعود المقطوف

حتى سكنت القبر *** مازلت نرجى فيك

لانك صديق القلب *** صادق معاك وبيك

تجيني مع الاحلام *** ولو كان مت نجيك

انت حبيب القلب *** وانا اللي نبيك

كل ماسهرت الليل *** لازم نفكر فيك

ويزيد عندي الشوق *** مهما بكيت عليك

لانقولك بتجيني *** ولا ما اللوم عليك

انت بعيد عليا **** وانا بعيد عليك

شرط اللقا ياعمري *** تفنى الحياة ونجيك

قبيلة الحرارات

جميل الدم والاجمل الدين *** اجتمعوا اثنين ماتبقى حزين

سلامي ليك ياغرة العين *** سلام القلب والافضل العين

طبع الفكر ياخذ بالرزين *** وطبع العين يعجبها الزين

وطبع البعد والفرقة سنين *** ترجع حن ساكن في الكمين

تلقا الخوت راكبها الدين *** وبعد فراق يحلف باليمين

نبقوا خوت لو كان العرين *** خذلك بعيد والابعد العين

خوت الدم في طبرق سنين *** معاهم خوت بنغازي حنين

كلام الود يبقى في الجبين *** حتى يطول ملقانا سنين

تبقى ليك شلغودة حنين *** وناصر دوم وامداكم العين

وكل الزاوية لينا عوين *** واهل طرابلس فوق الجبين

حراري كان نبعثلك حنين *** بطول العمر واخلاق الامين

 

الى من لم يتكرر (Alhanon )

تمر العين بالعين ونرضى

 جمـــــــــــــال العين والوجــــــــه الحنون

وزاد القلب ان كان جريحا

 طريـــــــد الفكر لايعـــــــــــــــــرف فنون

كريم الروح ياطيب المحيا

ســــــــــــــلام الصمت يأتي مـــــــن جنون

الم تعرف اني لك حبيبا

 فــــــــــــــلا عشقي بمثلك قــــــــــد يهون

حنون العمر مازلنا سويا

 ولكــــــــــــــن يدعم الصمـــــــت السجون

وعهدي بيك لو تدري مليا

 لانــــــــــــي لم ازد عنـــــــــــــك شجون

واني لم اضق صدرا ولكن

اثـــــــــــــرت الصمت مالي فــــي الطعون

وبعد اليوم لن احسب مليا

 لان الكنـــــــــــز منكســــــــــــــر الظنون

حبيبي كنت انتظر التهاني

 ففـــــــــــاجئني بأكثـــــــــــــــــــر مايكون

وليس لي لوما بضعفٍ

ولكن توبـــــة العاصـــــــــــــــــي تصون

وادعوا الله ان يرضى علينا

 واسكـــــــــــــن جنتا جنبـــــــــي الحنون